ઊર્મિનો સાગર - please visit www.urmisaagar.com

બધા મિત્રોને હેપી મધર્સ ડે !

ઉસકો નહીં દેખા હમને કભી,
પર ઇસકી જરૂરત ક્યા હોગી?
એ મા… એ મા, તેરી સૂરત સે અલગ,
ભગવાન કી સૂરત ક્યાં હોગી… ક્યાં હોગી?
ઉસકો નહીં દેખા હમને કભી… 

(આ મારું ખુબ જ પ્રિય ગીત છે, સ્મૃતિમાંથી લખ્યું હોય થોડા શબ્દો-ફેર હોય શકે છે…  આ ગીત વિશે મને વધુ કાંઇ જ ખબર નથી… જયશ્રી, આને તારા ટહુકા પર કો’કવાર ટહુકાવજે હોં!)

એમ તો ભારતીય તરીકે આપણે ઘણીવાર પાશ્ચાત્ય પરંપરાઓનું વિવેચન કરી બેસીએ છીએ કે મધર્સ ડે અને ફાધર્સ ડે ને ઉજવવાની શી જરૂર છે?  એવું હોય તો એમનાં ઘરડા માતા-પિતાને નર્સિગ હોમમાં શું કામ મુકી આવવામાં આવે છે?  અમારે ત્યાં તો રોજ જ મધર્સ ડે ને ફાધર્સ ડે હોય છે! (જો કે, એ ય કાંઇ બધે જ સાચું નથી!)   હા, એ વાત પણ સાચી છે… પરંતુ મારું અંગત માનવું છે કે પાશ્ચાત્ય પરંપરાનું વિવેચન કરવાનો આપણને શો હક્ક?  એકદમ સાદી વાત છે- આપણે કેવા છીએ એ જ પહેલાં આપણે જોઇએ, અને કોઇનું કાંઇ ન ગમે તો એમના જેવા ન થઇએ… બસ!!  બધાની અલગ અલગ પરંપરાઓમાંથી આપણને જે ગમે, આપણને જે આનંદ આપે અને આપણને જે ઉચિત લાગે એ વસ્તુ સ્વીકારવામાં ખોટું શું છે?!  એમાં આપણા સંસ્કારોને ક્યાં કોઇ આંચ આવે છે!

આજનો મારો મધર્સ ડે… કંઇક વધારે સ્પેશ્યલ બની રહ્યો!  (જો કે હું બહુ લાંબી વાત નહીં કરું, પ્રોમિસ!)

આ અઠવાડિયે મારા પાંચ વર્ષનાં વિશાલની સ્કૂલમાં બધા છોકરાની મધર્સ માટે ટીચર્સે ગિફ્ટ અને કાર્ડ બધાની પાસે બનાવડાવ્યા ત્યારે એનો ઉત્સાહ અને એની ખુશી એવી તો અનેરી હતી કે એના ચહેરાની ખુશીની એ એક એક પળ મને મધર્સ ડે ગિફ્ટ જ લાગી છે. એ પળો ન મળી હોત તો પણ કોઇ અસંતોષ ન હતો, પરંતુ એ પળો મળી તો જાણે ધન્ય ધન્ય થઇ ગઇ!  સવારે ઉઠીને (ડેડીએ લાવેલી ગિફ્ટ આપ્યા બાદ) એનાં ડેડીની સાથે કાર્ડમાં ગિફ્ટ તરીકે મૂકેલી ટી-બેગમાંથી ચા બનાવીને મને ‘સરપ્રાઇઝ’ આપી… (જો કે, એ ‘સરપ્રાઇઝ’ની વાત તો મને આખું વીક કરી કરીને એણે ગોખાવી દીધી હતી!) પણ મને કહી દીધું કે મારે એ લોકો જોડે મારી ચા share કરવી પડશે… કારણ કે ‘Sharing is good… good people always share!’ (મારું જ ભણાવેલું ગણિત, ઘણીવાર એ મને જ ભણાવે છે!) નહીંતર એ અને એના  ડેડી બહુ જ Sad થઇ જશે… પછી એનાં રૂમમાં જઇને એનાં Crayons નાં બોક્સમાંથી પિંક કલરનો ક્રેયોન લઇ આવ્યો અને આપતા આપતા એ  મને કહે કે “Pink color is only for girls… so, I am giving this to you, mamma… you can keep it!!”  

લંચ માટે બહાર ગયા હતા તો ઘાસમાં ઉગેલાં પીળાં જંગલી ફૂલો થોડી થોડી વારે તોડી તોડીને મને આપ્યા કરે ને બોલ્યા કરે કે ‘હેપી મધર્સ ડે, મમ્મા!’  આમ તો બે-ત્રણ દિવસથી જ કંઇ ને કંઇ શોધી લાવી ને મને ‘હેપી મધર્સ ડે, હેપી મધર્સ ડે!’નું વિશ કર્યા જ કરતો હતો… એને તો જાણે ખૂબ જ મજા પડી ગઇ હતી, અને એને મજા પડેલી જોઇને મને વધારે મજા પડી ગઇ.  મને તો આજે ખૂબ જ કિંમતી મધર્સ ડે ગિફ્ટ મળી ગઇ હતી!  અને આવી રીતે મારો મધર્સ ડે ઉજવાઇ ગયો, પરંતુ પતી નથી ગયો… એ તો હજુ થોડા દિવસ ઉજવાશે, જ્યાં સુધી વિશાલ એને ઉજવ્યા કરશે!

હા, પણ એનાં ડેડીએ એને હવે ચોખ્ખું કહી દીધું છે કે ‘બેટા, સ્ટોરમાં જઇને મમ્મા માટે ગિફ્ટ તો એક જ વાર લવાય… OK!!’