પગલાં વસંતના -મનોજ ખંડેરિયા January 23, 2007
Posted by ઊર્મિ in ઊર્મિની પસંદ, કાવ્યો/ગઝલો.12 comments
વસંતપંચમીની સૌ મિત્રોને શુભેચ્છાઓ!!
આવો, આપણે ઋતુઓનાં રાજા વસંતને આવકારીએ…
* * *
આ ડાળ ડાળ જાણે કે રસ્તા વસંતના,
ફૂલોએ બીજું કૈં નથી, પગલાં વસંતના.
મલયાનિલોની પીંછી ને રંગો ફૂલો ના લૈ,
દોરી રહ્યું છે કોણ આ નકશા વસંતના !
આ એક તારા અંગે ને બીજો ચમન મહીં,
જાણે કે બે પડી ગયા ફાંટા વસંતના !
મહેંકી રહી છે મંજરી એક એક આંસુમાં,
મ્હોર્યા છે આજ આંખમાં આંબા વસંતના !
ઊઠી રહ્યા છે યાદના અબીલ ને ગુલાલ,
હૈયે થયા છે આજ તો છાંટા વસંતના !
ફાંટુ ભરીને સોનું સૂરજનું ભરો હવે,
પાછા ફરી ન આવશે તડકા વસંતના !
* * *
*
આજનો દિવસ, એકદમ ખાસ દિવસ… એક તો આજે વસંતનાં પધરામણાં… અને બીજું, મારા ‘એ’નાં પધરામણાં પણ ધરતી પર આજના દિવસે જ થયા હતા… એટલે ‘મારા વસંત’ને પણ ખુબ ખુબ શુભેચ્છાઓ!
*
