આવી ગયો હઇશ! -જવાહર બક્ષી January 12, 2007
Posted by ઊર્મિસાગર in ઊર્મિની પસંદ, કાવ્યો/ગઝલો.trackback
જ્યારે હું તારા ખ્યાલમાં આવી ગયો હઇશ,
દુનિયાથી દૂર, આપમાં આવી ગયો હઇશ.
આપું નહીં હું આમ કદી કોઇને વચન,
નક્કી હું તારી વાતમાં આવી ગયો હઇશ.
સાચે જ તારી સૂક્ષ્મ નજર હોવી જોઇએ,
અમથો શું તારી આંખમાં આવી ગયો હઇશ!
લાગે છે દૂરતા સમી આત્મીયતા હવે,
લાગે છે પાછો ભાનમાં આવી ગયો હઇશ.
મારા વિષે તને ઘણા પ્રશ્નો થતા હશે,
એ માનીને જવાબમાં આવી ગયો હઇશ.
* * *
કવિ શ્રી જવાહર બક્ષીની જીવનઝાંખી
*
જવાહર બક્ષીની ગઝલો વાંચવી એ એક લ્હાવો છે… સુંદર ગઝલ…