કાગળ ને કલમ નીકળે -બેફામ October 26, 2006
Posted by ઊર્મિ in ઊર્મિની પસંદ, કાવ્યો/ગઝલો.trackback
ચાહું તો છું કે આ પરદો ઉઠે ને એ સનમ નીકળે,
મગર ડર છે - ન નીકળે કોઇ ને મારો ભરમ નીકળે.
તો નક્કી માનજો - મેં રાતે એનું ખ્વાબ જોયું છે,
સવારે આંખ હું ખોલું અને એ આંખ નમ નીકળે.
બધા પર્વત સમા છે, બોજ દિલનો થઇ રહ્યો છે એ,
નદી જેવા નથી કે આંસુ વાટે મારા ગમ નીકળે.
ત્રણે ત્રણ કાળને ભૂલવા હું આવ્યો છું સુરાલયમાં,
ન એવું થાય સાકી, જામ મારો જામે જમ નીકળે.
પ્રણયને પાપ કહેનારા, થશે તારી દશા કેવી?
કદાચ અલ્લાહને ત્યાં એ જ જો દિલનો ધરમ નીકળે?
જગત જો ગોળ છે તો ચાલવામાં રસ પડે ક્યાંથી?
ગણું છું જેને આગેકુચ એ પીછે કદમ નીકળે.
બધાનાં હાથમાં લીટા જ દોર્યા છે વિધાતાએ,
પછી ક્યાંથી કોઇ વાંચી શકે એવા કરમ નીકળે?
ફક્ત એથી જ કોઇની મદદ માંગી નથી શકતો,
શરમથી હાથ લંબાવું અને એ બેશરમ નીકળે.
કદી મારા જિગરમાં એ રીતે ના આવશો કોઇ,
તમે જ્યાં છાપ પાડી હોય ત્યાં મારા જખમ નીકળે.
બીજો સામાન તો ક્યાં છે કવિ બેફામના ઘરમાં?
કે લૂંટવા જાઓ તો થોડાક કાગળ ને કલમ નીકળે.
* * *
વાહ !
જગત જો ગોળ છે તો ચાલવામાં રસ પડે ક્યાંથી?
ગણું છું જેને આગેકુચ એ પીછે કદમ નીકળે.
તો નક્કી માનજો - મેં રાતે એનું ખ્વાબ જોયું છે,
સવારે આંખ હું ખોલું અને એ આંખ નમ નીકળે.
એક એક શબ્દ જાણે કે સોનાની લગડી હોય એમ લાગે છે.
સવારે આંખ ખોલું ને નમ નીકળે!! ખૂબ સરસ.
its wondarfulll i hv no words ….pari
extra ordinary-every one should read other gazals of “Befam”.