દિલની દીક્ષા છે -બેફામ August 22, 2006
Posted by ઊર્મિસાગર in ઊર્મિની પસંદ, કાવ્યો/ગઝલો.trackback
પડી હો જાણે પગમાં શૃંખલા એવી પ્રતીક્ષા છે,
ભલા આ તે તમારી પ્રીત છે કે કોઇ શિક્ષા છે.
છું તારા માર્ગ પર ને તોય વાગે છે મને કાંટા,
કહે ઓ ઇશ, આ તે મારી કે તારી પરીક્ષા છે?
જીવન જેવું ન હોતે તો ન હોતે ઝંખના જેવું,
દીધું છે દાન તેં જ એજ મારે કાજ ભિક્ષા છે.
વસંત ને પાનખર છે બેયમાં એક જ દશા મારી,
ચમનની માટી જેવી મારા જીવનની તિતિક્ષા છે.
કહે છે પ્રેમ જેને એ ધરમ છે જિન્દગાનીનો,
કહે છે જેને સૌ દીવાનગી એ દિલની દીક્ષા છે.
વિરહની રાતના અરમાન ક્યાં, દિવસો મિલનના ક્યાં?
નવાઇ છે - સિતારાઓને સૂરજની પ્રતીક્ષા છે.
કયામતના દિવસનો અર્થ બીજો કંઇ નથી બેફામ,
વિધાતાનાં લખાણો પર ફરિશ્તાની સમીક્ષા છે.
* * *
તિતિક્ષા - સહિષ્ણુતા, સહન કરવાની વૃત્તિ
સમીક્ષા - નિરીક્ષણ, બારીક તપાસ
*
કયામતના દિવસનો અર્થ બીજો કંઇ નથી બેફામ,
વિધાતાનાં લખાણો પર ફરિશ્તાની સમીક્ષા છે.
બહુ ઊંચી વાત છે !
સુંદર ગઝલ.
બેફામ ની ગઝલોમાં બહુ જ ગહેરી વાતો ના નિર્દેશ નો અનુભવ થાય છે.
આભાર !
“વસંત ને પાનખર છે બેયમાં એક જ દશા મારી,
ચમનની માટી જેવી મારા જીવનની તિતિક્ષા છે.”
ખૂબ જ સુંદર ,,,ખરેખર,’બેફામ’સાહેબ ની દરેક ગઝલો સ્પશી જાય છે. !!
આભાર